Жалал-Абад шаарында өткөн 2016-жылы капиталдык салым тартуу жагынан өсүштөр болду. Бул тууралуу шаар мэриясынын экономикалык өнүгүү бөлүмүнүн башчысы Салижан Умаров билдирди.

Анын айтымында, өткөн жылы шаарда курулуштар, инфраструктуралык калыбына келтирүү иштери көп болуп, жалпысынан капиталдык салымдардын көлөмү кыйла артты.

- Мисалга алсак, 2015-жылы шаарда тартылган капиталдык салымдардын көлөмү 421,3 миллион сомду түзгөн болсо, өткөн 2016-жылы капиталдык салымдардын жалпы көлөмү 596,6 миллион сомго жеткен. Мурдагы жылга салыштырмалуу өсүү темпи 141,6 пайызга аткарылган, - дейт ал.

Алынган маалыматтарга караганда, быйылкы жылга карата да капиталдык салымдардын көлөмү мурдагы жылдарга караганда кыйла өсө тургандыгы тууралуу божомолдор бар.