Казакстан жүргүнчүлөрдүн коопсуздугун камсыз кылуу максатында темир жол бекеттеринде адамдарды милдеттүү түрдө текшерүү тартибин киргизүүдө. «Казакстан темиржолы» компаниясынан билдиришкендей, жүргүнчүлөрдү жана алардын жүктөрүн текшерүү тартиби баскыч менен жүзөгө ашат.

Маалыматка караганда, 1-февралдан баштап жүргүнчүлөрдү текшерүү тартиби Алматы-1 жана Алматы-2 темир жол бекеттеринде, 1-апрелден Астана, 1-июндан тарта өлкөнүн башкы темир жол бекеттеринде киргизилет. Ал үчүн ондогон атайын текшерүү жабдыктары сатылып алынган.

Азырынча жүргүнчүлөрдү текшерүүнүн тартиби менен анын узактыгы тууралуу маалымат жок.

Казакстанда 16-январда террордук корунучтун «сары» чеги алынган. Ал өткөн жылдын июнунда Актөбөдөгү куралдуу кол салуулардан кийин киргизилген. Окуядан кийин өлкө парламенти терроризм жана экстремизмге каршы күрөшүү тууралуу мыйзамга бир катар өзгөртүүлөрдү киргизип, күч түзүмдөрү бир канча жолу антитеррористтик машыгууларды өткөргөн.