АКШ президенти Барак Обама Вашингтондун Орусия менен конструктивдүү мамиледе болуусу Американын, ошол эле маалда бүткүл дүйнөнүн кызыкчылыгына жооп берерин билдирди.

Обама мамлекет башчысы катары өткөргөн акыркы маалымат жыйынында Владимир Путиндин кайрадан Орусиянын президенти болуп шайланып келиши антиамерикалык риториканы күчөтүп, кайрадан кансыз согуш кезиндегидей маанайды жаратканын билдирди. Өз кезегинде бул эки тараптуу алакаларды оорлоткон. Обаманын айтымында, АКШ дайыма Орусия менен конструктивдүү мамиледе болууга аракет кылып келген. Ал Орусияга каршы санкциялар Украинадагы абалга байланыштуу киргизилгенин жана ал туура чечим болгонун билдирди.

Обама Челси Мэннингдин камактагы мөөнөтүн кыскартуу чечими тууралуу суроого жооп берип жатып, ага карата өтө эле катаал чечим чыгарылганын айтты. Ал жашыруун маалыматтарды WikiLeaks сайтына бергендиги үчүн 35 жылга соттолгон Мэннинг өз катачылыгын түшүнүп, катуу жазаланды деп эсептейт.

Обама ошондой эле өзөктүк куралдарды азайтуу боюнча акыркы макулдашуулардан кийин Орусия бул тармакта сүйлөшүүлөрдү улантууга ынтызарлыгын көрсөтпөгөнүн айтты. Ал шайланган президент Дональд Трамп өзөктүк куралды азайтуу маселесинде ийгиликтерге жетишет деп үмүттөнөрүн кошумчалады.