Орусия президенти Владимир Путин маалымат жыйыны учурунда Дональд Трамп Москвада жеңил ойлуу кыздар менен жолукпаганын, сулуулар сынагында ал дүйнөдөгү эң келишимдүү айымдар менен баарлашканын билдирди.

Путиндин айтымында, Трамп бир нече жыл мурун Москвага келген. Ал учурда саясий ишмердүүлүк жүргүзчү эмес. Орусия президенти Трамп ал кезде тек Американын эн бай адамдарынын бири болгонун, атайын кызматтар ар бир америкалык миллиардерди аңдыбай турганын баса белгиледи.

"Экинчиден: Трамп келип, анан дароо москвалык сойкулар менен жолугушканга ашыгыптырбы? Бул көп жылдардан бери сулуулар сынагын уюштурган, тотугуп калган киши. Ал дүйнөдөгү эн сулуу айымдар менен баарлашкан. Анын мейманканага жүгүрүп барып, биздин кыздар менен жолукканын элестетүү оор болуп жатат. Сөз жок, биздин сойкулар дүйнө боюнча эң мыкты, бирок Трамп ага азгырылганына күмөнүм бар",-деди Путин.

Путин АКШнын шайланган президентине жалаа жабылып жатканын айтып, аны жасагандарды “сойкудан дагы жаман” деп баалады.

Өткөн жумада АКШ атайын кызматтары Трамп тууралуу Орусиянын колундагы компроматтарды президент Барак Обамага жана жаңы шайланган президентке беришкени маалым болгон. Анда америкалык миллиардер Москвага болгон сапары учурунда жеңил ойлуу жергиликтүү кыздардын кызматынан пайдаланганы айтылган.