Жалал-Абад шаарындагы жеке ишкерлердин демилгеси менен 16-январда Чүй облусунун Сокулук районундагы Дача-Суу айылында болгон авиакырсыкта жабыркаган мекендештерибизге материалдык жардамдар чогултулду. Бул боюнча уюштуруучулардын бири Аида Матиева билдирди.

Анын айтымында, Чүй облусунда болуп өткөн авиакырсыкка байланыштуу андагы жабыркаган мекендештеге аз да болсо жардам көрсөтүү иретинде шаардагы жеке ишкерлердин жардамы менен чогулган материалдык жардамдар КР Өзгөчө кырдаалдар министрлигинин  облустагы башкармалыгына өткөрүлүп беилди.  

- Бул материалдык жардамдардан тышкары каалоочулар акчалай жардамдарын  атайын ачылган банктык эсептерге которуп жатышат. Болуп өткөн бул каргашалуу окуяга баарыбыз кайдыгер карабай колубуздан келген жардамдарды аябашыбыз керек, - дейт ал.

Ал эми облустагы Өзгөчө кырдаалдар министрлигинин ыкчам бөлүмүнүн улук офицери Акылбек Ботобековдун айтымында, кырсыкка байланыштуу гуманитардык жардамдарды кабыл алуу максатында облуста 13 кабыл алуу пункттары ачылып, анда кызматкерлер  24 саат бою иш алып барып жатышат.