Күн мурун Өзбекстандан Ошко делегация келди. Сүйлөшүүлөргө журналисттер киргизилген жок. Сапар жүрүшүндө меймандар Бабур атындагы өзбек академиялык театрында болуп, актерлордун иши менен таанышышты.

Театрдын жетекчиси Набижон Мамаджановдун айтымында, жолугушуу маалында Өзбекстандын вице-премьер-министринин орун басары Адхам Икрамов театрга жардам берилерин билдирген. Аткаминер Өзбекстандын Маданият министрлиги 50 миң АКШ доллары өлчөмүндөгү каражат бөлгөнүн белгилеген. Жардамга бериле турган акча кайсы иштер үчүн жумшалары азыр аныктала элек.

Быйыл театр падыша жана акын Бабур Мирзо жөнүндө спектакль коюуну пландоодо. “Пьесаны биз Өзбекстандан алдык, эми бул өлкөнүн бийлиги костюм, декорация, стенография жагынан жардам берүүнү чечти. Жакынкы келечекте биз бул чыгарманы көрүүчүлөргө тартуулайлы деп жатабыз. Мындан тышкары бизге Бабур жашап өткөн жерлерге –Анжиян, Ахсикент, Фергана өрөөнү жана Наманганга гастролго чыгууну уюштурууну сунушташты”,- деди Набижон Мамаджонов.

Соңку жылдары Өзбекстан менен Кыргызстан ортосунда бир гана саясий эмес, маданий алакалар дагы сууп кеткен. Набижон Мамаджоновдун айтымында, акыркы жолу Бабур театры Өзбекстанга 17 жыл мурун гастролго барган.