Кылмыштын бетин ачууга көмөктөшкөн “Асман” таксидеги айдоочулар жана окуяга күбө болуп көмөктөшкөн жарандарды, ошол убакта нөөмөттө турган мобильдик группадагы ИИОгы кызматкерлерди Жалал-Абад ОИИБнын башчысы Жеңиш Жоробеков куттуктап, ОИИБнын ардак грамота менен сыйлады.

Өз сөзүндө Ж.Жоробеков: "Кылмышкерлер менен күрөшүүдө коомчулуктун жардамы маанилүү экендигин жана такси кызматындагылар буга үлгү болуп бере алды"-деп билдирди.

Жалал-Абад ОИИБнын басма сөз кызматынын берген маалыматына караганда, үстүбүздөгү жылдын 12-январь күнү болжол менен саат 05-30 чамаларда Жалал-Абад шаарындагы “Асман” такси кызматында иштеген Сузак районунун Кызыл-Туу айыл өкмөтүнүн Кызыл-Сеңир айылынын тургуну 1998-жылы туулган Р.Н. Жалал-Абад шаарында такси айдап жүргөндө, ошол жерден жүргүнчү катары автоунаага чыккан бейтааныш, жашы болжол менен 20-25 жаштагы атуул чыгып айдоочу Р.Н. ны коркутуп, “ДЕУ-МАТИЗ” үлгүсүндөгү ак түстөгү автоунаасын укукка жат түрдө ээлеп алып, окуя болгон жерде белгисиз тарапты көздөй багыт алып, иизин жашырып качып кеткен.

Натыйжада аталган факт боюнча Патрулдук милиция бөлүмү (ПМБү) тарабынан “Перехват” атайын ыкчам иш-чаралары киргизилип, тез арада жүргүзүлгөн ыкчам иш-чаралардын негизинде кылмыш иизин суутпай, аталган факты боюнча Сузак районунун тургуну 1992-жылы туулган А уулу Б Жалал-Абад шаарынын Тайгараев көчөсүндө кармалып, Жалал-Абад ШИИБнүн тергөө бөлүмүнө өткөрүлүп берилди.

“Бул окуя боюнча Жалал-Абад шаардык ички иштер бөлүмү тарабынан 172-берененин (Автоунааны укукка жат түрдө ээлеп алуу) 2-бөлүмүнүн 3-пункту менен кылмыш иши козголуп тергөө амалдары жүрүүдө”, - деп билдирет ОИИБнын басма сөз кызматы.