17-январь  КР Атайын багыттагы полкунун (АБП)   түзүлгөн күнүнө карата Жалал-Абад облусунун ички иштер органдарынын өздүк курамы арасында аскердик жөө жүрүш (марш бросок) болду. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, жөө жүрүш  "Мекеним менин Кыргызстан" долбоорунун алкагында, кызматтык ишмердүүлүктү аткарууда ок атуучу куралды колдонууну, ок атуунун ыкмаларын жана тажрыйбасын калыптандыруу, бекемдөө жана күжүрмөн даярдыктарын чыңдоо максатында уюштурулду.

Алгач, сапка тизилип баарынын толукталган жүк каптары текшерилди. Жөө жүрүш шаардан 10 км аралыкта жайгашкан  ок атуу талаасына чейин каз катар тизилип белгиленген мөөнөттө чуркоо жана аскердик-патриоттук  ырларды ырдоо менен барышты. 

Аскердик жүрүштүн маршруту бир эле багыт менен болбостон ар тараптан бөлүктөр бөлүнүп шаардын, калктуу конуштарынын арасынан, көп улуттуу аймактарды басып өтүштү. Жөө жүрүштүн дагы бир терең максаты - жарандарыбызга дем берүү менен алардын коопсуздугу дайыма камсыздалып тургандыгын билдирүү, элдин ишенимин арттырууну көздөйт.

Аскердик жөө жүрүштүн катышуучулары полигондо практикалык ок атуу (бутага таамай атуу), тоо шартындагы машыгуулар уюштурулуп, ага кошумча спорттук иш-чаралар менен коштолду. Өздүк курам арасында спорттук оюндар кызуу жүрүп, спорттун отджимание түрүнөн 324 жолу дене тулку бойду жерден көтөргөндөр жана 105 жолу 24 кг салмактагы гиря көтөрүп 1-орунду багындыргандар да  аныкталып сыйланышты.

“Мындан сырткары, аркан тартыш мелдештери да уюштурулду. Бул иш чара  квартал сайын Жалал-Абадда  активдүү өтүп келет”, - деп билдирет ОИИБнын басма сөз кызматы.