Дүйшөмбүдө түрк полициясы Стамбулдагы терактка шектелген Өзбекстандын жараны Абдулкадыр Машариповду камаганын жарыялады. Reina түнкү клубундагы кол салууда 39 киши өлүп, 65и жаракат алган.

Түрк маалымдоо каражаттарынын билдиришинче, Машарипов Стамбулдун Эсенйурт районунда кармалган. Бир күн мурун полиция чабуулдун алдында шектүү жашаган батирден 150 миң доллар тапкан.

Бейрасмий маалыматтар боюнча Абдулкадыр Машарипов Түркияга 2016-жылдын башында аялы жана эки баласы менен келип, Конья шаарында жашаган. 15-декабрда ал террордук чабуулга даярдануу үчүн Стамбулга барган. Түрк бийлиги теракт профессионалдык денгээлде чалгындоо уюмдарынын жардамы менен ишке ашканын билдирүүдө.

Жаңы жыл түнү шектүү жаран клубга такси менен барып, эс алуучуларга ок чыгарган. Теракт учурунда сегиз өлкөнүн жарандары курман болгон. Жоопкерчиликти “Ислам мамлекети” тобу өз мойнуна алган.