Кечээ, 16-январда өкүл Кыянбек Сатыбалдиев облустук бюджеттик мекеме-ишканалардын жетекчилери менен атайын жыйын өткөрдү. Анда “Манас” Эл аралык аэропортуна жакын жерде авиакырсыктан жабыр тарткандарга жардам көрсөтүү маселеси каралып талкууланды.

Облустук жана район-шаарлардагы бюджеттик мекеме–ишканалардын жетекчилери бир ооздон бир күндүк эмгек маяналарын авикырсыктан жабыр тарткандарга которуп берүү демилгеси менен чыгышты.

Мындан сырткары, КР ӨКМнин облустук башкармалыгында кырсыктан жабыр тарткандарга атайын жардам көрсөтүү пунктары ачылды. Учактын кыйрашынан жабыр тартышкан мекендештерибизге тамак-аш жана жылуу кийим-кечектер менен буюмдардан жардам берүүнү каалагандарды кабыл алуу боюнча КР ӨКМнин облустук башкармалыгында  0770 800 081, 03722 2 19 70  жана 0772 07 76 07  “түз байланыш” телефондору иштеп жатат.

“Манас” Эл аралык аэропортуна жакын жерде кыйраган Туркия мамлекетине таандык жүк ташуучу “Боинг-747” учагынын кыйрашынан улам ондогон мекендештерибиз каза болушту. Каргашалуу ал кырсыктан Ноокен районундагы Курулуш айылынын тургундары, 1993-жылы туулган, 8 айлык боюнда бар Венера Дүйшеева, 2011-жылы туулган Алибек Камилов жана 2013-жылы туулган Исабек Камилов да каза болушкан.

Кыргыз Республикасынын Президенти Алмазбек Атамбаевдин Жарлыгы менен 17-январь бүткүл өлкөбүз боюнча аза күтүү күнү деп жарыялангандыктан Жалал-Абад облусундагы мекеме-ишканаларда мамлекеттик желектер түшүрүлдү.

 Жолдошбай Осмонов, өкүлдүн басма сөз катчысы.