Жалал-Абад шаардык кеңешинин 12-январда өткөн сессиясы мыйзамсыз жана төрага шайланмайынча анын орун басары шайлана албайт, - деп билдирди бүгүн, 13-январда өткөн маалымат жыйында шаардык кеңештин КСДП жана “Кыргызстан”  фракциясынын лидерлери.

Шаардык кеңештин КСДП фракциясынын лидери Абдилбает Мамасыдыковдун сөзүнө караганда, 12-январда өткөн шаардык кеңештин сессиясына расмий чакыруу берилген эмес. Уюлдук телефондорго гана билдирүү жиберилген.

- Биз өз ара келишимди талкуулап отурган болчубуз. Анан сессияга депутаттар толук келбегендиктен, убактылуу өтпөй турат деген маалыматты угуп калдык. Бардык нерсе мыйзамдын негизинде болуш керек. Сессияга депутаттардын үчтөн экиси катышуусу шарт деп жазылып турат. Биз өзүбуз мыйзамды бузуп жатсак, анда шаардык кеңештин пайдубалын туура эмес куруп алабыз да. Биринчи сессияда сөзсүз түрдө эки маселе каралат. БШКнын чечими окулуп, депутаттарга мандат тапшырылат, андан кийин кворум болсо төрага шайланат. Кечээ болсо кворум болбой төрага шайланбай туруп эле, анын орун басарын шайлап жатышат. Кабыл алынган чечимге төрага кол койбосо, ал юридикалык күчкө ээ болбойт. Ошол себептен, биз 12-январда өткөн шаардык кеңештин сессиясынын мыйзамдуулугун текшерип берүүсүн жана бул сессия легитимдүү эмес экендигин билдирип БШКга, Жалал-Абад облустук райондор аралык сотуна, шаардык прокуратурага арыз менен кайрылдык. Биз кайрылган органдардан жоопту алгандан кийин гана шаардык кеңеш өз ишин мыйзам жолунда улантып кетет. Бизде кеңейтилген коалиция түзүү ниетибиз бар, - дейт А.Мамасыдыков.

Ал эми шаардык кеңештин “Кыргызстан” фракциясынын лидери Эмилбек Абдыкадыровдун маалыматына караганда, бардык эле партиялар менен шаардын кызыкчылыгы үчүн биргелешип иштөөгө даярбыз. Көпчүлүк коалиция түзүү боюнча кол алышып, сүйлөшүүлөр жүрүп жаткан. Анан эле бул шашылыш сессия чакырылып, сүйлөшүүлөр аягына чыкпай калды. Үч партия биригип көпчүлүк коалиция түзүп меморандумга кол коюлгандыгы боюнча бизге эч кандай билдирүү берилген жок. Биз укуктук талаага кайтып келиш үчүн өзүбүздүн кайрылууларды БШК, шаардык прокуратура, Жалал-Абад облустук райондор аралык сотуна жиберип койдук. Эми алар карап чыгып кандай чечсе, ошого жараша иш болот, - дейт Э.Абдыкадыров.

Эскерте кетсек, 12-январда Жалал-Абад шаардык кеңешинин жаңы чакырылышынын биринчи уюштуруу сессиясы болуп, анда депутаттарга күбөлүктөр жана төш белгилер тапшырылып, кворумдун жетишсиздигинен төрага шайланбай, убактылуу болсо да анын орун басары шайланган.

Сессияга КСДП жана “Кыргызстан” фракциялары катышкан эмес. “Өнүгүү-Прогресс”, “Ата-Журт” жана “Республика – Ата-Журт” фракциялары баары болуп 16 добуш менен “Биримдик” көпчүлүк коалициясын түзүшкөнүн жарыялашкан. Депутаттар шаардык кеңештин төрагасынын орун басарын шайлоого киришишип, көпчүлүк коалициядан бул орунга мурда шаардык кеңештин төрагасы болуп иштеп келген Эрнисбек Ормоков шайланган.