Жалал-Абад шаарында 2015-жылдын 26-декабрында төрөлгөн үч эм балдарды жергиликтүү бийликтер турак жай менен камсыздап, аларга үйдүн  ачкычы тапшырылды. Бул тууралуу шаардык кеңештин төрагасынын орун басары Эрнисбек Ормоков билдирди.

Анын айтымына караганда, шаарда жергиликтүү бийликтер дайыма жардамга муктаж жарандарга жардам берип келет жана бул жолкусунда үч эм балдарга шарт түзүлүп жатышы өтө кубанычтуу.

-Бул маселе боюнча атайын бизге кат келип түшкөн, ошол каттын негизинде маселе сессияга коюлуп, жыйынтыгында жергиликтүү бийлик тараптан 1 миллион сом акча каражаты бөлүнгөн. Натыйжада, Жалал-Абад шаарынын Ленин көчөсүндө жайгашкан көп кабаттуу үйдөн үч бөлмөлүү батир алынып берилди. Биз Кыргызстандын келечеги үчүн кайдыгер карабаганга аракет жасайбыз, – дейт ал.

Батирлүү болгон үч эмдин энеси Шахнозахон Абдазимованы куттуктаган шаардын вице-мэри Айзат Раматиллаева аларга жакшы каалоолорун айтты.

Үч эм төрөлгөн балдардын ата-энелери шаардык кеңештин депутаттаына жана шаар мэриясына терең ыраазычылыгын билдирди.