Жалал-Абадда “Санпа шейиттери” коомунун мүчөлөрү Азимжан Аскаровдун абактан чыгышына каршы жана аны өмүр бою абакта калышын талап кылышат.

Аталган коомдун мүчөсү Кеңеш Калбаевдин айтымында, июнь коогалаңы боюнча айыпталып, өмүр бою эркинен ажыратылган Азимжан Аскаров акталып чыгат деген кептер коомчулук арасында айтылып жатат. Мындан улам аталган коомдун 10го жакын мүчөсү сот, бийлик өкүлдөрүнө кайрылууну туура көрүп, чогулушкан. Алардын пикиринче, А.Аскаровду өмүр бою эркинен ажыратуу боюнча Жогорку соттун чечими күчүндө калышы керек.

- А.Аскаровду өмүр бою эркинен ажыратуу боюнча мурунку өкүм күчүндө калсын деп элдин баары талап кылууда. Бизден 10 мүчө атайын пикир билдирели деп, журналисттердин алдына чыктык. Бизде 100дөн ашуун мүчө бар, баарыбыз бир пикирдебиз. “Акталат экен” деген имиш да жөн жеринен айтылбайт, ошондон улам пикирибизди билдирип коёлу дедик. Ал жазасын албаса, эртеңки күнү кимдир бирөө дагы бул ишти кайталашы мүмкүн. Ал акталса, мамлекет тынч болбойт, - дейт К. Калбаев.

Эскерте кетсек, Азимжан Аскаров 2010-жылы июнь айындагы улуттар аралык коогалаң учурунда милиция кызматкери Мыктыбек Сулаймановдун өлүмүнө айыпталып, сот тарабынан өмүр бою эркинен ажыратууга өкүм кылынган. 

Үстүбүздөгү жылдын 17-январында Чүй облустук соту тарабынан Азимжан Аскаровго карата өкүм чыгаары күтүлүп жатат.