Ош шаардык жаштар иштери боюнча комитетинин дебат клубу тарабынан ОшТВ телеканалында «Жаштар эмне дейт?» теледебат таймашы уюштурулууда. Бул тууралуу уюштуруучулардын бири Байгазы Мамашев билдирди.

Маалыматка ылайык, “Жаштар эмне дейт?” телетаймашы жыл ичинде эки сезондун негизинде ойнотулат. Жеңүүчүлөргө баалуу белектер каралган.

“30-январга чейин оюнга катышуучулардын каттоо жүрөт. Андан соң командаларга теледебаттын шарттары туурасында атайын тренинг-семинар уюштурулат.  Оюндун негизги максаты - жаштардын логикалык ой жүгүртүүсүн арттыртуу, сүйлөө чеберчилигин жогорулатуу, критикалык анализ жасоого үйрөтүү болуп саналат.Теледебатка 16-жаштан 28-жашка чейинки бардык жарандар катыша алышат”, - деди Б.Мамашев.

Ошондой эле, оюндун жүрүшүндө ар бир темасына ылайык тиешелүү кызматкерлер да анализ жүргүзүшүп, келтирилген маалыматтары боюнча өз баасын беришет.