Жалал-Абад шаарында мектеп окуучуларынын жүрүм-турум аракеттерин каникул учурунда көзөмөлгө алуу максатында рейд өткөрүлдү. Бул тууралуу шаардык мэриянын социалдык бөлүмүнүн жетектөөчү адиси Салтанат Алтынбекова билдирди.

Анын айтымында, каникул учурунда мектеп окуучуларынын арасында укук бузуу фактыларынын алдын алуу боюнча атайын иш-чаралар жүрүп, Жалал-Абад шаардык мэриясы, шаардык социалдык өнүгүү башкармалыгынын балдарды коргоо бөлүмү, шаардык билим берүү бөлүмү, шаардык ички иштер бөлүмүнүн жашы жетпеген өспүрүмдөр инспекциясынын кызматкерлери чогуу “Каникул” аталышындагы рейд өткөрүштү.

- Мындай иш-чаралар жыл сайын каникул учурунда уюштурулуп келет. Балдардын укугун коргоо жана алардын арасындагы укук бузуу фактыларынын алдын алуу үчүн мындан башка да чаралар көрүлүүдө. Азыр биз оор жумушка тартылган жаш өспүрүмдөрдү каттоого алып, алардын укуктарын коргоо, түшүндүрүү иштерин жүргүзүү, мектеп администрациясына кабарлап, андан аркы аракеттерди талкуулоо иштери жүрүп жатат, - дейт ал.