Жалал-Абад шаарында 2016-жылы өспүрүмдөр арасында кылмыштуулук былтыркы жылга салыштырмалуу кыйла азайды. Бул тууралуу Жалал-Абад шаардык ички иштер бөлүмүнүн жашы жетпеген өспүрүмдөр инспекциясынын башчысы Камчыбек Шаболотов билдирди.

Анын айтымында, өспүрүмдөр арасында жүргүзүлгөн комплекстүү алдын алуу чаралары өзүнүн натыйжасында берип, өткөн жылы кылмыштуулук саны мурдагы жылга салыштырмалуу кыйла азайган.

- 2015-жылы өспүрүмдөр арасындагы катталган кылмыштуулуктардын саны 26 болсо, алардын 10у уурулук фактысы болуп саналат. Ал эми 2016-жылы жашы жете электердин арасындагы түрдүү кылмыш менен 16 өспүрүм кармалган. Жыйынтыгында мурдагы жылга салыштырмалуу жаштар арасындагы катталган кылмыштардын саны онго азайган. Ошондой эле шаардык мэрия, шаардык социалдык өнүгүү башкармалыгынын балдарды коргоо бөлүмү, шаардык билим берүү бөлүмү менен биргеликте “Каникул”, “Түнкү өспүрүм”, “Балдарды эмгекке үйрөтүүгө - ооба, пайдаланууга –жок” атту ар кандай рейддер өткөрүлдү, - дейт ал.

Азыркы учурда окуучулардын каникул убагында кылмыш жолуна түшүп калбасы үчүн иш-чаралар жүргүзүлүп жатат.