Жалал-Абад шаарынын суу менен камсыз кылуу жана саркынды суу системасын калыбына келтирүү долбоорунун биринчи этабы алтымыш пайыз аткарылып калды. Бул тууралуу шаар мэриясынын долбоорлорду ишке ашыруу бөлүмүнүн башчысы Садыр Айтбаев билдирди.

Анын айтымында, бул долбоорду ишке ашыруунун акыркы компонентинин алкагында тендер аркылуу негизги подрядчик тандалып алынган. Азыркы учурда жыл ичинде долбоордук аткарылган иштердин көлөмү 440,2 миң еврого барабар болду.

-Подрядчик түзүлгөн контракттын негизинде ар кайсы өлчөмдөгү суу түтүктөрүн орнотуу, суу өлчөгүч-эсептегичтеринин кутуларын орнотуу, кожолуктарды суу эсептегичтерине улаштырууга даярдоо жана улаштыруу иштерин алып барды. Жыл боюу аткарылган иштердин көлөмү 440,2 миң еврого жетти. Ал эми долбоор башталгандан берки аткарылган иштердин көлөмү 3 миллион 482 миң 468 евро болду. Быйылкы жылы долбоордук иштер улантылат. Шаардын айрым аймактарына суу түтүктөрү жаткырылып, кожолуктарга суу эсептегичтери коюлат, - дейт ал.

Эскерте кетсек, аталган долбоор Жалал-Абад шаарында 2014-жылдан бери ишке ашырылып келе жатат. Долбоордун негизги донору Европанын реконструкциялоо жана өнүгүү банкы жана SECO уюму. Долбоордун жалпы наркы 8,25 миллион евро болсо, анын ичинде SECO уюму тарабынан 4,1 миллион евро гранттык каражат бар. Учурда долбоордун экинчи этабын даярдоо иштери да жүрүүдө.