“Жалал-Абад тазалык” муниципалдык мекемеси 2015-жылга салыштырмалуу 2016-жылы абоненттик төлөмдөрдү 3 миллион 443 миң 774 сомго көп жыйнады. Бул тууралуу аталган мекеменин жетекчиси Төлөнбек Бакиров билдирди.

Анын айтымында, 2015-жылы абоненттерден 19 миллион 124 миң 913 сом абоненттик төлөмдөр жыйналган болсо, 2016-жылы ал 22 миллион 568 миң 687 сомго жеткен.

- Биздин мекемеде мурдагы жылдарга салыштырмалуу абоненттик төлөмдөр үч жарым миллион сомго жакын көп жыйналды. Жыл башында мекемеге жергиликтүү бюджеттен 13 миллион 313 миң 200 сом, ал эми атайын каражаттын эсебинен 19 миллион 651 миң сом каралган болсо, жыл ичинде бюджеттен 11 миллион 956 миң 345 сом акча каражаты жумшалып, ал эми атайын каражат 22 миллион 568 миң 687 сом жыйналды. Жалпысынан иш-чараларга чыгымдалганы 21 миллион 434 миң, 400 сомду түздү, - дейт ал.

Эскерте кетсек, аталган ишкана абоненттердин санын тактоо аракеттеринин натыйжасында алардын санын көбөйткөн, демек абоненттик төлөмдөр саны да арткан.