Жалал-Абадда өткөн 2016-жылы жугуштуу оорулар менен ооруган жарандардын саны азайган. Бул тууралуу Жалал-Абад облустук үй-бүлөлүк медицина борборунун директорунун орун басары Хадича Пратова билдирди.

Анын айтымына караганда, калктын жугуштуу ооруларга чалдыгып калуусунун алдын алуу чаралары жүргүзүлүп, шаарда түшүндүрмө кагаздары жарандарга таркатылгып келди. Анын натыйжасында ар кайсы жугуштуу ооруларга чалдыккандар саны кыйла азайды.

- Бруцеллёз оорусуна чалдыгып калуу учуру 2016-жылы 12 болду, 2015-жылга салыштырмалуу эки эсеге азайган. Ал эми эхинококкоз оорусуна чалдыгып калуу фактысы 2015-жылы 7 болсо, 2016-жылы 3 эле жаран бул илдетке чалдыккан. Ошону менен катар энтерит оорусу 39га, ал эми диарея жугуштуу оорусу эки эсеге азайган.Ал эми кубанычтуу нерсе катары өткөн 2016-жылы кызамык оорусу менен ооруган жарандар болбогондугун айта алабыз, - дейт ал.

Облустук үй-бүлөлүк медицина борборунун берген маалыматына караганда, 2016-жылы Жалал-Абад шаарында энелер өлүмү да катталган эмес.