Жалал-Абад шаардык өрткө каршы мамлекеттик кызмат бөлүмүнүн кызматкерлери тарабынан өткөн 2016-жылы ар кайсы менчиктеги 38 миллион 590 миң сомдук материалдык баалуулуктар сакталып калган. Бул тууралуу Жалал-Абад шаардык өрткө каршы мамлекеттик кызмат бөлүмүнүн башчысы Кубаныч Токтосунов билдирди

Анын айтымында, шаардын  аймагында жайгашкан мамлекеттик жана чарбалык объектилерде, ошондой эле жеке менчик мекеме-уюм, ишканаларда, атуулдардын турак жайларында өрт кырсыктарын алдын алуу жана өрт коопсуздугун камсыз кылуу максатында өткөн жыл ичинде өрткө каршы профилактикалык иш-чаралар жүргүзүлгөн.

 -Биздин кызмат бөлүмү тарабынан жергиликтүү бийлик органдарына 62 жолу маалыматтар берилип, 3 чечим кабыл алынган. Чарбалык объектилерде өрт кырсыктарын алдын алуу багытында ошол объектилердин кызматкерлери менен 14702 атуулдардын катышуусунда 49 лекция жана 14369 адамдын катышуусунда 289 өрттүн алдын алуу боюнча инструктаждар өткөрүлгөн. Ошону менен бирге эле шаар аймагында жайгашкан 3243 турак жайлардын жашоочуларына жайкы өрт кооптуу мезгилдеги жана кышкы от жагуу мезгилдеги өрт коопсуздук эрежелери туурасында түшүндүрүү иштери жүргүзүлгөн, - дейт ал.

Эскерте кесек, шаар аймагында 2016-жыл ичинде 85 өрт кырсыгы катталып, өрттөн келтирилген материалдык зыян 6 миллион 687 миң сомду түзгөн. Ал эми күжүрмөн даярдыктагы кызматкерлердин өрттү өчүрүүдөгү ыкчам аракеттеринин натыйжасында 38 миллион 590 миң сомдук материалдык баалуулуктар сакталып калынган.