Казакстан президенти Нурсултан Назарбаев Карагандадагы беш кабаттуу үйдүн жарымы урап, каза тапкандардын туугандарына жана жакындарына көңүл айтты. Кырсыктын кесепетинен тогуз адам мерт кеткен.

Казак президенти жергиликтүү бийлик өкүлдөрүнө окуя учурунда жабыр тарткандарга ар тараптуу жардам берүү үчүн ыкчам чараларды көрүүнү тапшырды.

Бул арада Караганда облусунун акимчилиги курман болгондордун үй-бүлөлөрүнө бир миллион теңгеден, ал эми жабыр таркандарга 500 миң теңгеден акчалай жардам берет. Жергиликтүү бийлик каза тапкандарды жерге берүү зыйнатына кетчү чыгымдарын да көтөрөт.

Мыйзамга ылайык, кырсыктын кесепетинен келип чыккан чыгымдарды атайын комиссиянын эксперттери баалап чыгат. Анын жыйынтыгы менен жабыр тарткандарга компенсация төлөнүп берилет.

1-январь күнү кечинде Казакстандын Шахан шаарчасында көп батирлүү үйдүн жарымы урап, андан кеминде тогуз адам мерт болгон. Урандылардын алдынан беш адам куткарылган, алардын экөө – жаш бала.

Шахан шаарчасы борбор калаа Астанадан түштүк чыгышты көздөй 200 чакырым алыстыкта жайгашкан.