Шейшембиде Кошмо Штаттардын конгрессинин сенаты армия министри кылып Эрик Фэннингди дайындады. Ал адаттан тыш сексуалдык багыттагы адам экендигин жашырбайт. АКШнын армиясына алгачкы жолу мындай адам жогорку кызматка дайындалып отурат.

Акыркы жылдары Фэннинг АКШ коргоо министрлигинде бир катар жооптуу кызматтарда иштеп келген. Анын министр болуп дайындалышы ЛГБТ-кыймылындагыларга чоң дем берди.

«Эрик Фэннингдин армия министри болуп дайындалышы – куралдуу күчтөрүбүздөгү тең укуктуулукка жана адилеттүүлүккө болгон аракеттин илгерилеп жатышынан кабар берет”, - деп билдирди Human Rights Campaign укук коргоо уюмунун президенти Чад Гриффин. Сенаттын бул чечимин көптөгөн таасирлүү сенаторлор колдоого алды.

Эрик Фэннингди министр кылып дайындоо – АКШ президенти Барак Обаманын кезектеги кадамы. Анын тушунда кумсалардын армияда кызмат өтөөсүнө шарт түзүлгөн. Ошондой эле бир жыныстагы жубайлар үчүн мамлекеттик жеңилдиктер киргизилген.