Кыргызстан Өзбекстан менен болгон мамилени мындан ары дагы бекемдөө ниетинде. Бул тууралуу Алмазбек Атамбаев Шавкат Мирзиёевге жолдогон кайрылуусунда билдирген.

Катта Өзбекстанда болгон иш сапары учурунда кыргызстандык делегацияга көрсөтүлгөн меймандостук үчүн ыраазычылык айтылган. Алмазбек Атамбаев кайрылуусунда Кыргызстан менен Өзбекстандын ортосундагы түбөлүк достук тууралуу кол коюлган келишимдин 20 жылдык мааракеси белгиленген күндү жылуу маанайда эскерет.

“Биз эки тараптуу кызматташтыктын мындан аркы багыттарын аныктап, өз ара түшүнүшүүгө жетиштик деп терең ишенем. Достук тууралуу келишимге жаңы өмүр тартууланып, ал эки өлкөнүн жыргалчылыгы үчүн иштейт деп ойлойм”,-деп белгилеген Атамбаев.

Өлкө башчы жолугушуу учурунда жетишилген макулдашуулар Кыргызстан менен Өзбекстандын ортосунда келишпестик жараткан бардык маселелерди чечүүгө жол ачат деп үмүттөнөт.

Өз катында Алмазбек Атамбаев Өзбекстан президентин 2017-жылы Кыргызстанга расмий сапар менен келип кетүүгө чакырган.

Президент Өзбекстанга 2016-жылы 24-декабрда иш сапар менен барган.