Кыргыз Республикасынын Өкмөтүнүн Жалал-Абад областындагы ыйгарым укуктуу өкүлү Сатыбалдиев Кыянбек Урмаматовичтин Жалал-Абад облусунун калкын кирип келаткан жаңы 2017- жылы менен куттуктоосу

Урматтуу Жалал-Абад облусунун тургундары!

Соңуна чыгып бараткан 2016-жыл “Тарых жана маданият” жылы катары бардык мекендештерибиздин эсинде калды. Сандаган кылымдар катмарында башынан нечендеген оош-кыйыш тагдырларды өткөрүп, тарыхы менен санжырасынын, улуттук маданияты менен салтынын көрөңгөсүн бөксөртпөй келген уңгулуу элибиз Президент Алмазбек Шаршеновичтин “Тарых жана маданият жылы жөнүндө” Жарлыгын кубануу менен кабыл алды.

Айрыкча илимпоздорубуз менен маданият ишмерлерибиз үчүн мөмөлүү жыл болду. Алар сан кылымдардан бери катылып жаткан тарыхый жана маданий казыналарыбыздын актай барактарын толуктоого кошумча мүмкүнчүлүк алышты.

Бул жылы Ысык-Көлдө өткөн “Бүткүл дүйнөлүк экинчи көчмөндөр оюндарына” облусубуздун маданият ишмерлери зор салымдарын кошуп, алдыңкы байгелерге ээ болушту. Массалык маалымат каражаттарында облусубуздун тарыхы, маданияты, салты кенен чагылдырылып, телетасмалар көрсөтүлдү.

Облусубуздун чарбалык, экономикалык, социалдык тармактарында алгылыктуу өсүштөр болду. Айрыкча “Балыкчы – Жалал-Абад” алътернативдүү автомагистралынын курулушу өз нугунда жүрүп жатышы бардыгыбызды кубандырууда. 11-декабрда жергиликтүү кеңештерге шайлоолордо жана Референдумда облусубуздун эли жарандык активдүүлүктү көрсөттүңүздөр.

Өкмөттүн облустагы өкүлчүлүгү 2017-жылда “Ош - Бишкек” автомагистралынын “Барпы - Маданият” аралыгындагы бүтпөй калган 67 километрин баштоо, “Жалал-Абад” аэропортунан Бишкекке жумасына 3 рейс авиакаттам жүргүзүүнү ишке ашыруу сыяктуу бир катар ири социалдык-экономикалык приоритеттүү жумуштарды жасоону пландап жатабыз.

Урматтуу облусубуздун тургундары! Кирип келген жаңы 2017-жылды кубанычтар менен тосуп алыңыздар. Жаңы жылыбыз бакубатчылыктын, ынтымакчылыктын бардык тарабынан төп келишкен жылы болсун. Жараткан бардыгыңыздарга жакшылыктарды ыроолосун. Бардыгыңыздардын аруу тилектериңиздер ишке ашсын!