Кечээ, 28-декабрда Жалал-Абад облусуна Өзгөчө кырдаалдар министри Кубатбек Боронов иш сапар менен келди. Ал өкмөттүн Жалал-Абад облусундагы өкүлчүлүгүндө жыйын өткөрүп, ага өкмөттүн облустагы өкүлү Кыянбек Сатыбалдиев да катышты. 

Жыйында К.Сатыбалдиев жыл бою Жалал-Абад облусунда болгон өзгөчө кырдаалдар боюнча токтолуп, жаратылыш кырсыктарын алдын алууда жана аны жоюда көрсөткөн жардамы үчүн Өзгөчө кырдаалдар министрине жана анын эмгек жамаатына ыраазычылыгын билдирди. 

Өз кезегинде министр Боронов аткарылган иштер боюнча маалымат берип, быйыл жаз, жай жамгырлуу болуп жер көчкү, сел сыяктуу кырсыктар көп болгонун айтты. «Быйыл, 2016-жылы өзгөчө кырдаалдарга 1 миллиард сом чыгымдалды. Анын басымдуу бөлүгү Баткен, Жалал-Абад облустарына берилди»,- деди Боронов. 

Министрдин маалыматына ылайык келе жаткан 2017-жылы район, шаарлардагы өзгөчө кырдаалдар бөлүмдөрүнүн ишин оптималдаштыруу үчүн пландар түзүлүүдө. Анын алкагында министрликтен 370 орун бошотулуп, анын ордуна райондордо мониторинг жана байкоо жүргүзүүчү адистер тартылат. Куткаруу, өрт өчүрүү бөлүмдөрүн кеңейтүү да каралып жатат.

Жыйында министр Кубатбек Бороновго Чаткал районун, Ноокен районунун Сакалды айыл аймагынын, Базар-Коргон районунун Кеңеш айыл аймагынын «Ардактуу атуул» наамдары ыйгарылды. Ал эми Кубатбек Боронов калк арасында министрликтин ишине жардамдашкан жарандарды ардак грамота менен сыйлады.

Андан сырткары өкмөттүн Жалал-Абад облусундагы өкүлү Кыянбек Сатыбалдиев Таш-Көмүр шаарында ушул жылдын 16-декабрында кырсыктаган 4 адамды куткаруу ишинде көрсөткөн күжүрмөндүгү үчүн өзгөчө кырдаалдар министрлигинин бир катар кызматкерлерди Ардак грамота менен сыйлады.

“Аймак.kg”