Жалал-Абад шаарында жаңырып келе жаткан Жаңы жыл майрамына карата үч балаты тургузулуп, шаар аймагы көрккө келсе, шаар мэриясы ишканалар арасында майрамдык жасалгалар боюнча сынак өткөрүп жатат. Ал эми 28-декабрь күнү балдар үчүн Жалал-Абад шаарынын мэринин балаты майрамы өткөрүлдү. Бул тууралу шаардын вице-мэри Айзат Раматиллаева билдирди.

Анын айтымында, шаар жетекчилигинин балдарга арналган балаты майрамына 500 бала келди.

- Майрамдык балатыга шаар аймагындагы аз камсыз болгон үй-бүлөлөр, жакшы окууган  мектептин алдыңкы окуучулары, ошону менен катар мүмкүнчүлүгү чектелген, жетим жана жарым жетим балдар болуп, 500 катышып жатат. Бул жерде балдарга концерттик программа, жомокторду сахналаштыруу, башка да оюн-зооктор жана ар бир балага атайын белектер тапшырылды, - дейт ал.

Эскерте кетсек, шаар мэриясы буга чейин да бала бакчадагы жана балдар үйүндөгү майрамдык балатыларды уюштурган.