Жалал-Абаддагы Барпы атындагы драма театрынын фойе-залында облустун район-шаарларындагы мектептеринен Ыйгарым укуктуу өкүлдүн «Балаты майрамына» келген 125 окуучуну жана аларды коштоп келген ата-энелер менен мугалимдерди өкүл Кыянбек Сатыбалдиев куттуктап, жаңы жылдык баалуу белектерди тапшырды. 

- Урматтуу окуучулар! Мына бүгүн силер облусубуздын ар тарабынан келип, жаңы жылдык балаты майрамына катышып жатасыңар. Силерди ушул балаты майрамына өзүңөр окуган мектептердеги окуучулардын арасынан тандап жөнөтүштү.

Азыр силерди коштоп келген ата-энелериңер, ага-эжелериңер жана мугалимдериңер да чексиз кубанычта болуп турушат. Анткени силер мектепте жакшы окуп, классташтарыңарга, курбу-курдаштарыңарга өзүңөрдүн адептүү жүрүш-турушуңар менен үлгү болосуңар.

Балалык кездеги бул күнүңөр силердин эсиңерде өмүр бою сакталып калат. Силер бул жерде бири-бириңер менен жакындан таанышып, достошуп, тез-тез кабарлашып тургула.

Силердин араңарда келечектеги мугалимдер, спортсмендер, артисттер, ырчылар, жазуучулар, инженерлер, врачтар, учкучтар, куруучулар, ишкерлер, тарыхчылар, философтор, саякатчылар жана ар тараптуу окумуштуулар бар.

Силер мындан ары да жакшы окуп, курбу-курдаштарыңарга үлгү болгула. Ата-энеңерди ар дайым кубандыргыла. Кыргыз мамлекетин дайыма жакшы жагынан дүйнөгө тааныткыла.

Мен силерди ушул балаты майрамыңар жана кирип келаткан жаңы жылыңар менен Кыргыз Республикасынын Өкмөтүнүн Жалал-Абад облусундагы ыйгарым укуктуу өкүлүнүн аппаратынын, өзүмдүн жана облусубуздун элинин атынан чын дилимден куттуктайм!

Бардыгыңар Кыргызстандын туу көтөрчү уул-кыздарынан болуп өскүлө. Бабабыз Манастын урпактары деген даңктуу наамды бекем сактагыла. Жаңы жылда бардыгыңарга окуудагы ийгиликтерди, үй-бүлөдөгү тынчтыкты, ден-соолукту каалайм.

Өмүрүңөр узун, өрүшүңөр жайык болсун, менин бөбөктөрүм жана ини-карындаштарым! Дагы бир жолу жаңы жылыңар менен!-деп сөзүн аяктады ыйгарым укуктуу өкүл Кыянбек Сатыбалдиев.

«Балаты майрамында» окуучуларга театрдын артисттери кызыктуу жомокторду инсценировкалап көрсөтүштү. Окуучулар да өз өнөрлөрүн тартуулашты.

Тактай кетсек: Ыйгарым укуктуу өкүлдүн «Балаты майрамы» 26-27-28-декабрь күндөрү облустун аймагындагы бир катар адистештирилген билим-тарбия берүү мекемелеринде өтөт.  Бул иш-чараларга өкүлдүн резервдик фондунан 288 миң сом бөлүнгөн.

Ыйгарым укуктуу өкүлдүн пресс-катчысы Уланбек Парманов.