Алыскы Чыгыштагы Амур дарыясы аркылуу Кытай менен Орусияны бириктирчү автоунаа көпүрөсүнүн курулушу 24-декабрда башталды. Бул тууралуу Кытайдын мамлекеттик ММКлары жазып чыгышты. Курулуш боюнча келишимге бир жыл мурун кол коюлган, долбоор болсо 28 жыл мурун эле сунушталган болчу.

Долбоорго ылайык, 20 чакырымдык көпүрө Хэйлунцзян провинциясындагы Хэйхэ шаары менен Орусиянын Благовещенск шаарын бириктирет. Кытай көпүрөнүн үчтөн бирин, Орусия үчтөн эки бөлүгүн куруу милдетин алган. Андан сырткары орус инженерлерине көпүрөнүн эки бөлүгүн бириктирүү милдети жүктөлгөн.

Көпүрө жылына үч миллиондон ашык жүк жана бир жарым миллонго жакын жүргүнчүнү тейлөөгө кубаттуу. Объектини 2019-жылдын октябрында пайдаланууга берүү пландалууда. Бирок айрым эксперттер Москва менен Пекиндин өз ара ишенбөөчүлүгүнүн фонунда көпүрөнүн курулушу графиктен кечеңдеши мүмкүн дешүүдө.

Анткен менен Батыштын санкцияларынын басымы алдында турган Орусия товарларын Кытайга экспорттоого кызыкдар. Пекин болсо өз экономикасынын өнүгүүсү үчүн орусиялык энергоресурстар менен сырьолордун жеткирилип турушун каалайт.

Башка биргелешкен инфраструктуралык долбоорлордун токтоп тургандыгын эске алганда, Амур дарыясы аркылуу өтчү 355,6 миллион долларга бааланып жаткан көпүрөнү пайдаланууга берүү мөөнөтү кийинки жылдарга жылдырылышы мүмкүн.