Жалал-Абад шаарындагы медициналык колледждин 100дөн ашуун студенти Жалал-Абад облустук кан борборуна барып, кан тапшыруу менен донорлор катарын толукташты. Бул тууралу Жалал-Абад облустук кан борборунун директору Нурдин Эрматов билдирди.

Анын айтымында, мындай демилге, саамалык үчүн Жалал-Абад шаардык мэриясынын алдындагы жаштар комитети, медициналык колледждин студенттери чоң алкыштарга арзайыт.

- Жарандар канткенде кан донору боло алат? - деген суроо баарыбыздын оюбузга келсе керек, Албетте, 18 жаштан 60 жашка чейинки курактагы ар бир адам, атайын медициналык кароодон өткөн соң, кан донору боло алат. Донор-өмүр сакчысы деп коёт, колубуздан келсе ар бирибиз миңдеген адамдардын өмүрүн сактап калсак болот. Бизде донорлордун саны өсүп келе жатат, учурда Жалал-Абад облусу боюнча 3 миң донор бар. Эми алардын катарын стдент жаштарыбыз да толуктагандыгы бизди кубандырууда, -дейт Н.Эрматов.

Алынган маалыматка караганда, Жалал-Абад облустук кан борборунда күнүнө 20 литрден ашуун кан сакталат. Кан жетпей калуу коркунучу буга чейин жаралган эмес.