Жалал-Абад облустук кан борбору, Жалал-Абад шаарынын мэриясынын алдындагы жаштар комитети жана шаардагы медициналык колледждин студенттери биригип,  атайын “Кан тапшырып,өмүр тартуула” аттуу массалык жөө жүрүш уюштурушту. “Донор берген кан-сакталган жан!”, “Донор болуу - урмат, адам өмүрү - кымбат” деген  чакырыктар жазылган транспаранттарды көтөрүп, жаштар шаар көчөлөрүнөн өтүштү.

Мэриянын социалдык өнүгүү бөлүмүнүн башчысы Гулина Базаркулованын айтымында, бул массалык акция жарандардын бири-бирине боорукер, камкор болушуна түрткү берет. 

-Кан борборуна бул убакка чейинда ар кайсы ишканалардын кызматкерлери кан тапшырып келишкен, бирок буга жаштар талаптагыдай тартылган эмес болчу. Эми бул донорлук ишке окуу жайларын, андагы окутуучулар менен студенттерди да тартуу максаты турат. Себеби, жаштар донорлукка бет алуу менен өздөрүндө адамдык жакшы сапаттардын болушуна да жетишет деген ойдобуз.Албетте, биз студенттердин активдүүлүгүнө ыраазыбыз, бүгүнкү акцияга 100дөн ашуун студент катышты, - дейт ал.

Акциянын жыйынтыгында, бул жөө жүрүшкө катышкан бардык жаштар донорлор катарын толукташарын билдиришти жана бул боюнча бардык окуу жайларынын студенттерине чакырык ташташты.