Түркмөнстандын мамлекеттик дүкөндөрүндө кайрадан чылымдар пайда болуп, ири кезектерди жаратууда. Айрым учурда кардарлар менен укук коргоо органдарынын ортосунда жаңжал чыгууда.

Өткөн жумада бир жарым айлык тыныгуудан кийин Ашхабаддагы мамлекеттик дүкөндөрдө чылымдар пайда болду. Алардын баасы 19 манат (5,5 АКШ доллары) турат. Бирок кезекке турган жүздөгөн адамдын ичинен он чактысы гана чылым сатып алууга үлгүрдү. Мындан тышкары бир кишиге бир куту гана чылым сатылат, аялдарга болсо такыр эле тыюу салынган.

“Суроо-талап көп болгондуктан, дүкөн текчелериндеги чылымдар 40 мүнөттөн кийин эле түгөнүп калууда. Ага карабай, кезекте эң аз дегенде 200 киши турат”,-деди сатып алуучулардын бири.

Жекшембиде Дашөгүз облусунда кезекке тургандар менен полициянын ортосунда чыр чыкты. Тартип сакчылар чогулгандарды таратуу үчүн алардын авто унааларынын номурларын чечип алышкан. Бул маалда эл полицияга чабуул жасап, номурларын кайтарып алышты.

Түркмөнстан 2011-жылы Бүткүл Дүйнөлүк Саламаттыкты сактоо уюмунун “Чылымга каршы күрөшүү” конвенциясына кол койгон. Ошондон бери ар кыл чектөөлөр киргизилип келет.