«Азаттык» радиосуна каршы багытталган деп эсептелип жаткан ЖМКлар тууралуу мыйзамга сунушталган айрым чектөө чаралары алынып салынды. Бул тууралуу өзгөртүүлөрдүн демилгечилеринин бири, Жогорку Кеңештин депутаты Кожобек Рыспаев аталган долбоор боюнча парламенттик угуулар маалында билдирди.

Рыспаев өзгөртүүлөр телеканалдардын ишине гана тиешелүү болорун белгиледи. Анын айтымында, көрсөтүлгөн мыйзамдын 5-беренесине чет өлкөлүк жеке жана юридикалык жактардын Кыргызстанда иштеп жаткан ЖМКлардын 35% ашык акциясына ээ болуусуна тыюу сала турган ченем киргизилүүдө.

Депутат бардык өлкөлөрдөй эле Кыргызстан да өз медиа чөйрөсүн коргоо боюнча тиешелүү чараларды көрүшү керектигин жана өзгөртүүлөр улуттук коопсуздукту коргоого гана багытталганын белгиледи.

Угууга катышып жаткан жарандык коом өкүлдөрү сунушталган өзгөртүүлөр өлкөдөгү сөз эркиндигин чектеши мүмкүн деп долбоордун кабыл алынышына каршы экендиктерин билдиришти.

Ушул жылдын 22-июнунда Жогорку Кеңеш ЖМКлар жөнүндөгү мыйзамга өзгөртүүлөрдү киргизүү тууралуу мыйзам долбоорун биринчи окууда жактырган.