Жалал-Абад шаарында быйылкы он бир айдын ичинде өткөн жылдын ушул мезгилине караганда көп жумуш орундары түзүлгөн. Бул тууралуу шаар мэриясынын экономикалык өнүгүү бөлүмүнүн башчысы Салижан Умаров билдирди.

Анын айтымында, шаарда он бир айдын ичинде бир катар майда жана орто ишканалар ачылып, жумушчу орундары түзүлгөн.

- Быйылкы жылы ошол ар кайсы ишканалардын ачылганынын жана өндүрүштүк кубаттуулуктар кеңейгендигинин эсебинен өткөн жылдын он бир айына караганда жумуш орундары көбүрөөк түзүлдү. Алсак, өткөн жылы он бир айдын ичинде 14 миң 864 жумуш орундары болгон болсо, быйылкы жылдын он бир айында жумуш орундарынын саны 16 миң 256га жетип, өсүү темпи 109,4 пайызды түздү. Же болбосо, өткөн жылдагыга караганда 1392 жумуш орундары көп болду, - дейт ал.

Эскерте кетсек, акыркы мезгилдерде Жалал-Абад шаарында инфраструктуралык жакшыртуу долбоорлору активдүү ишке ашырылып, майда жана орто ишкердик чөйрөлөрүндө жандануу байкалууда.