Беларуссиянын Минск шаарында алыш күрөшү боюнча өткөн дүйнөлүк чемпионатта Казыбек уулу Ирлан алтын медаль алып, Жалал-Абадга жеңиш менен кайтты.

Дүйнөлүк чемпион болуп кайткан Ирландын айтымында, 17 мамлекеттен балбандар катышкан мелдешке Кыргызстандан 3 кыз, 3  эркек балбан катышып, экөө алтын медаль алган. Учурда Ирлан Жалал-Абад мамлекеттик университетинин физкультура бөлүмүндө 3-курста билим алат. Жалал-Абад шаарындагы И.Раззаков атындагы адистештирилген балдар жана жаш жеткинчектер олимпиадалык спорт мектебинде 3 жылдан бери алыш күрөшү менен машыгып келет.

«Машыгуу катуу болду. Чемпионатка жеңем деген ой менен баргам. 70 кг салмакта биринчи украиналык, андан кийин беларуссиялык балбан менен күрөштүм. Финалдык беттешке дагы украиналык балбан чыкты. Ийгиликтүү күрөшүп, өлкөнүн намысын коргоп келдим», - дейт Ирлан.

Аталган спорт мектептин директору, Ирландын машыктыруучусу Чыңгыз Акановдун айттымында, үч жылдык машыгуу өз жемишин берип, дүйнөлүк чемпионатта ал өлкө намысын коргоп, жакшы ийгилик менен кайтты. “Ирланга өкмөттүн облустагы ыйгарым укуктуу өкүлү Кыянбек Сатыбалдиев жаңы жылга карата өзүнүн резервдик фондунан 30 миң сом бөлүп бере турган болсо, Ноокендин акими жер тилке берүүнү убада кылды”, - дейт Ч.Аканов.