Ош шаарындагы “Сулайман-Тоо” борбордук мечитинде Кыргызстан мусулмандарынын дин башкармалыгына караштуу түштүк аймагындагы облустук жана шаардык казыяттар, шаардык жана райондук хатибияттардын иш аракеттери боюнча жыл жыйынтыгын чыгаруу иш-чарасы болду.

Жалал-Абад облусунун мусулмандар казысы Закиров Абдулазиз каары облус аймагында жыл ичинде аткарылган негизги иш-чаралар, мечиттердин каттоосу, дин кызматкерлеринин аттестациясы жана билимин жогорулатуусу, Коргоо Кеңешинин чечимдерин ишке ашыруусу жана аймактардагы саясий кырдаал жөнүндө кыскача маалымат берди.

Казыяттардын аткарган иштери жана өз аймагындагы структуралары менен мобилдүү иш алып баруу өзгөчөлүгүнүн негизинде жыл ичинде аткарган иштеринин жыйынтыгы менен 1-орунду алгандыгы үчүн Жалал-Абад казыяты Кыргызстан Мусулмандарынын Дин Башкармалыгынын «Ардак грамотасы» жана 5 миң сом акчалай сыйлыгы менен сыйланды.

Эске салсак, 2014-жылдан бери Жалал-Абад казыяты 1-орунду багындырып келе жатат.

Ошондой эле, Жалал-Абад облусунун аймагында райондук хатибияттар Кыргызстан мусулмандарынын дин башкармалыгынын “Ардак грамотасы” жана кызыктыруучу сыйлыктар менен сыйланышты:

1-орун Базар-Коргон райондук хатибияты - жетекчиси: Шаиков Т. ажы
2-орун Аксы райондук хатибияты - жетекчиси: Абдыкалыков М. Ажы
3-орун Ала-Бука райондук хатибияты - жетекчиси: Чыналиев Ш. Ажы.

Кыргызстан мусулмандарынын дин башкармалыгы тарабынан кеңселик иш тартибин жакшыртуу максатында Жалал-Абад казыятына 1 түстүү принтер, ал эми райондук жана шаардык хатибияттарга үч функциялуу принтер жана компьютерлер тапшырылды.

Жалал-Абад казыятынын басма сөз бөлүмү.