Орусиянын атайын кызматы Москвада теракт жасоону көздөгөн террордук уюмдун төрт өкүлүн кармады. Алардын ичинен үчөө – Тажикстан жараны. ФСБнын ыкчам кызматкерлери кылмышкерлерди Тажикстандын укук коргоо органдарынын жардамы менен колго түшүрүшкөнүн ырасташты.

«Интерфакс» Орусиянын ФСБсына шилтеме берип кабарлагандай, диверсиялык-террордук топ Тажикстан жана Молдованын жарандарынан куралган. Алар колго жасалган чоң кубаттуулуктагы жардыргыч заттын жардамы менен Москвада теракт жасоону пландашкан. Жардыруу “Ислам мамлекети” экстремисттик тобунун Түркиядагы эмиссарынын түздөн-түз көрсөтмөсү менен уюштурулмак. Эмиссар Тажикстандын ИИМи тарабынан эл аралык издөөгө алдынды.

Атайын операция учурунда алар турган батирден Калашников автоматтары, ок-дарылар жана колго жасалган жардыруучу заттар табылган.

Бир ай мурда ФСБ атайын операциянын алкагында Москва жана Санкт-Петербургда 10 террорчуну кармаган. Алардын жанында төрт колго жасалган ири кубаттуу жардыргыч зат, курал-жарак, ок-дары жана байланыш каражаттары болгон.

Кармалгандардын бири Орусияда теракт жасоого камданышканын моюнуна алган. Алар Санкт-Петербургдагы эки соода борборунда жардыруу уюштурууну көздөшкөн.