Казакстан кечээ, 16-декабрда Эгемендүүлүк майрамын белгиледи. Туура 25 жыл мурун Казакстандын суверенитеттүүлүгү жөнүндө конституциялык мыйзам кабыл алынган. Бул өлкөдөгү башкы майрам болуп саналат.

Көз карандысыздык күнүнө арналган иш-чараларда президент Нурсултан Назарбаев Казакстандын дүйнөлүк аренадагы ийгиликтерин белгилеп, бул жылдар аралыгында калктын байгерчилик дэңгээлин жогорулатуу мүмкүн болгонун билдирди. Мындан тышкары Назарбаев өкмөткө 2017-жылы 1-июлдан тарта пенсиянын жана баланын төрөлүшүнө байланыштуу бериле турган бир жолку жөлөк пулдун көлөмүн 20 пайызга көбөйтүүнү тапшырды.

Бүгүн Нурсултан Назарбаев Казакстандын Эгемендүүлүгүнүн 25 жылдыгына арналган монументти ачты. Салтанат ЭКСПО көргөзмөсүнүн аймагында өттү. Өз сөзүндө Назарбаев монумент келечек муундарга жана алдыда боло турган ЭКСПОнун конокторуна арналганын билдирди.

Эгемендүүлүктүн 25 жылдык монументин 3,5 ай ичинде курушту. Ал каррара мраморунан жасалган. Монумент катуу шамаалга туруктуу уникалдуу конструкцияга ээ.

Казакстандыктар кечээ дагы эки датаны эскеришти. Бири – Алматыдагы студенттердин жана жумушчу жаштардын толкундоолору болгон 1986-жылдагы Декабрь окуялары. Экинчиси – Жаңы-Өзөн окуясынын беш жылдыгы. Анда полиция иш таштаган мунайчыларга каршы ок чыгарган. Расмий маалыматтар боюнча Жаңы-Өзөн окуясы маалында 16 адам өлгөн жана жүздөн ашууну жаракат алышкан.