Жалал-Абад шаардын мэриясынын буйругунун негизинде шаардагы мекеме-ишканалардын арасында жаңы жылга карата имараттарды мыктылап кооздоо боюнча сынак жарыяланды. Бул тууралуу маалыматты шаардын вице-мэри Айзат Раматиллаева билдирди.

Анын айтымында, жаңы жылды тосууга арналган иш-чаралардын алкагында Жалал-Абад шаарынын аймагында жайгашкан менчигинин түрүнө карабай бардык мекеме-ишканалардын ортосунда өз имараттарын жаңы жылдык маанайда кооздоо боюнча сынак старт алды.

- Сынактын негизги максаты - 2017-жаңы жылды жакшы маанай менен тосуп алуу, Жалал-Абад шаарынын сырткы көрүнүшүн жакшыртуу, элге жаңы жылдык майрамдык маанай тартуулап, өзгөчө эстетикалык чөйрөнү түзүү болуп саналат. Жакшы жасалган имараттарга атайын акчалай сыйлыктар, баалуу белектер каралган, -дейт ал.

Эске сала кетсек, жарыяланган сынактын шарты боюнча жеңүүчүлөрдү аныктоо көрнөк-жарнактардын мазмунуна, кооздугуна көңүл бөлүшү, тартылган сүрөттөрдөгү эстетикалык табит, кооздук каражаттарынын өзгөчөлүгү, балатылардын кооздугу жана башка элементтерге карап эске алынат.