Өзбекстандын укук коргоо органдары сексуалдык кызмат көрсөтүү үчүн Казакстанга кыздарды жөнөткөн кылмышкерди кармады. Бул тууралуу жергиликтүү ММКлар билдирүүдө.

Бекабад шаарынын 24 жаштагы тургуну Елена Орлова кызмат көрсөтүү тармагында жогорку айлык маяна төлөнөрүн убадалап, өзбекстандык кыздарды Казакстанга жиберүү боюнча атайын канал уюштурган. Чек арадан өткөндөн кийин алар сексуалдык кулчулукка кабылышкан.

Күч түзүмдөрүнүн өкүлдөрү белгилегендей, Шымкентте кыздарды казакстандык Регина атту аял тосуп алып турган. Ал бир нече сауналардын ээси. Ар бир кыз үчүн Орлова андан 400 доллардан алып турган.

Кылмышкер Өзбекстандын улуттук коопсуздук кызматынын өкүлдөрү тарабынан Казакстанга “тирүү товарларды” жөнөтүүгө аракет кылып жаткан маалда кармалган. Ага карата “Адам сатуу” беренеси боюнча кылмыш иши козголгон.

Сот аны күнөөлүү деп таап беш жылга эркинен ажыратты. Бирок жазаны жумшарта турган жагдайлар болгондуктан, Орлова бир жылдык сыноо мөөнөтү менен шарттуу түрдө кесилди.