Бүгүн, 14-декабрь күнү КР Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев Кытай Эл Республикасынын Ляонин провинциясына караштуу Танжинь шаарынын вице-мэри Ху-Дэсян баштаган нефть өндүрүү тармагына адистешкен ишкерлердин тобун кабыл алды.

Жолугушууда Ху-Дэсян мырза Танжинь шаары нефть өндүрүүчүлөрдүн шаары экендиги тууралуу кеңири маалымат берип, Кыргызстандын түштүгүндө да нефть запастары арбын болгондуктан, аймакта биргелешип иштөө керектигин сунуштады.

Жолугушуунун соңунда өкүл К. Сатыбалдиев журналисттерге маалымат берип, Кытайдын Танжинь шаарынан келген мамлекеттик өкүлдөр облустун аймагында жылына 500 миң тонна нефть өндүрүп, солярка, бензин жана башка нефть продукцияларын чыгара алышарын белгиледи. Эгер долбоор ишке ашса Кытайлык инвесторлор бул ишке 300 миллион долларлык инвестиция салышат.

Тараптардын билдиришинче, салык төлөмдөрүнүн көлөмү азыркыга караганда 10 эсеге жолгорулап, облустун бюджетин толуктайт. «КПК», «Кыргызнефтегаз» ААКнын жабдуулары жаңыланып, нефтепродукталарды өндүрүүнүн сапаты артат.  Ошону менен бирге 200 миллион долларлык долбоор менен технопарк куруп, жалпы 3 миңдей жумуш ордун камсыздоо пландары да бар экен.

Тактай кетсек, бул долбоорлор  Кыргыз Өкмөтүнө мурдараак эле маалым болгон.

Уланбек Парманов, журналист.