Казакстандын Энергетика министрлиги нефть өндүрүүнү азайтуу боюнча ОПЕК менен түзүлгөн келишимдин өлкөдөгү ири мунайгаз кендерине тиешеси жок экенин билдирди.

Министрликтин маалыматына караганда, Казакстан Венадагы жыйында мунай өндүрүүнүн көлөмүн суткасына 20 миң баррелге кыскартууга макул болгон. Бул келишимдин жыйынтыгы менен Орусия нефть казуунун көлөмүн бир күндө 300 миң, Мексика – 100 миң, Азербайжан – 35 миң, Оман – 40 миң баррелге азайтат.

Кыскартуулар Түндүк-Каспий (Кашаган), Теңгиз жана Карачаганак сыяктуу ири долбоорлорго таасирин тийгизбейт. Суткасына 20 баррель Актөбө, Кызылордо, Мангыстоо кендеринин эсебинен азаят.

Кашаганда мунай өндүрүүнү коммерциялык деңгээлге чыгарууну бийлик өткөн айда убадалаган. Бул айда суткасына 1,7 миллион баррель нефть чыгарылган.

Чийки зат өндүрүүнү кыскартуу боюнча 10-декабрда глобалдык келишимге кол коюлгандан кийин мунайдын дүйнөлүк баасы өскөн.