Уурулук менен алектенген кылмыштуу топ Токтогул районунда 2 менчик соода дүкөндөрүн, жарандардын турак үйлөрүндөгү буюмдарын жана короолорунда турган 9 автоунаанын ар кандай тетиктерин уурдашкан. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, кылмыштуу топ автоунаанын: акумулятор, магнитофон, калонка, дөңгөлөктөрүн, ключ, домкрат, авто зарядка, генератор, карбуряторун,  айрым автоунааларды уурдап, ээн талаага алып барып керектүү тетиктерин чыгарып алышкан.

Ошондой эле, Токтогул шаарындагы №39 кесиптик лицейдин компьютеринин мониторун уурдап кетишкен. Жалпылап караганда жогорудагы 15 факт апрель, май айларындаТоктогул РИИБнө катталып, КР КЖКнын 164-статьясынын негизинде кылмыш иштери козголгон.

Жогорудагы уурулук фактылары боюнча Токтогул РИИБнүн кызматкерлери тарабынан  жүргүзүлгөн оперативдик иликтөө иштеринин негизинде, 14-май күнү район аймагындагы жогорудагы кылмыштардын бети ачылып, шектүү катары 5 адамдан түзүлгөн кылмыштуу топ кармалышты.

“Алар Токтогул шаарынын 19-22 жаштагы тургундары экендиги аныкталды.  Далил буюмдар алынып, жасаган кылмыштарын толугу менен мойнуна алышып, убактылуу кармоочу жайга киргизилди. Тергөө иштери жүрүүдө”, - деп билдирет басма сөз кызматы.