БУУнун кыйноолорго каршы комитети Түркмөнстандан 2017-жылдын декабрына чейин абакта дайынсыз жоголгондордун тагдыры тууралуу маалыматтарды берүүсүн өтүндү. Андан сырткары адамдардын сотсуз камалышы жана профессионалдык ишмердүүлүгүнө байланыштуу укук коргоочулар менен журналисттердин кармалышы боюнча маалыматтарды ачыктоого чакырды. Бул тууралуу БУУнун жаңылыктар борборуна шилтеме кылып «Фергана» агенттиги билдирди.

«Өлкөнүн мурдагы тышкы иштер министри Борис Шихмурадов дайынсыз жоголгон. Ал тууралуу 2002-жылдан бери эч нерсе белгисиз. Ошондой эле ЕККУдагы мурдагы элчи Батыр Бердыевдин тагдыры жөнүндө да эч нерсе белгисиз», - деп билдирди комитеттин эксперти Фелис Гайе.

Түркмөнстандын кыйноолорго тыюу салуу, жарандыгы жок адамдар менен мигранттардын укуктарын коргоо, гендердик теңдик, абактагы шарттарды жакшыртуу, ошондой эле адам сатууга каршы бир канча мыйзамдык актыларды кабыл алганы айтылууда.

Фелис Гайенин айтымында, Түркмөнстандан кыйноого алгандардын жазага тартылбай жаткандыгы, ошондой эле өлкөдө абактагыларга жаман мамиле жасоо учурларынын жайылгандыгы тууралуу билдирүүлөр дагы деле келип түшүүдө. Жыйынтыктоочу сунуштамалардын алкагында Түркмөнстанды адам укуктары жаатындагы абалга мониторинг жүргүзүү боюнча «чыныгы көз карандысыз» орган орнотууга үндөштү.

2013-жылдын октябрында Түркмөнстандын жарандык коому менен тилектештик тобу «Аларды тирүү көрсөткүлө!» аталышындагы эл аралык өнөктүк башталганын билдиришкен. Иш-чаранын максаты 2000-жылдардагы массалык репрессиялардан кийин түркмөн абактарында дайынсыз жоголгон адамдардын тагдыры боюнча маалыматтарга жетүү болгон.