Жалал-Абад шаарындагы №2 Кадыржан Закиров атындагы орто мектебинин мугалимдер жана эмгек жамаатынын  демилгеси менен мектепте марафон өткөрүлүп, андан чогулган акчаларды ден-соолугунан мүмкүнчүлүгү чектелген балдарга материалдык жардамдар көрсөтүлдү. Бул боюнча аталган мектептин директору Мукарам Моминова билдирди.

Анын айтымында, мектеп жамааты мүмкүнчүлүгү чектелгенине байланыштуу мектепке бара албаган балдарга жыл сайын түрдүү жардамдарды көрсөтүп келет. Бул жолу да 3-декабрь - мүмкүнчүлүгү чектелгендердин эл аралык күнүнө карата мектепте өткөрүлгөн марафондон чогулган он беш миң сом акча каражатын алардын үйлөрүнө барып беришти.

- Биздин мектепте бүгүнкү күндө  мүмкүнчүлүгү чектелген төрт бала тарибияланып жатат. Аларга мектептин мугалимдери үйлөрүнө барып билим берип келишет,- дейт М. Моминова.​

Шаардык билим берүү бөлүмүнүн башкы адиси Айнура Маданованын айтымында, шаар боюнча мүмкүнчүлүгү чектелген жалпы отуз бала бар. "Ден-соолугуна байланыштуу мектепке бара албаган бул балдардын аң-сезимин, сабаттуулугун жогорулатуу максатында мугалимдер үйлөрүндө сабак берип жатышат дейт",- ал.