Бүгүн, 16-май Ош шааарынын мэри Айтмамат Кадырбаев “Увам” каналында агып бара жаткан 9 жашар Нуризаны куткарып калган ӨКМнын Ош шаары боюнча башкармалыгынын башчысы Баймуратов Нурланды жана “Куткаруу кызматынын” нускоочусу Бекиев Мыктыбекти ардак баракча менен сыйлады. Бул тууралуу Ош шаардык мэриясынын басма сөз кызматы билдирди.

Алынган маалыматка караганда, шаар башчысы куткаруучулардын кылган баатырдыгы менен баары сыймыктана турганын билдирди. “Силер канчалаган табият кырсыктарында эрдик көрсөтүп келесинер. Көпчүлүк учурда өз өмүрүнөрдү тобокелге салып адам өмүрүн сактап каласынар. Арабыздан сиздердей баатырлар көбөйө беришине тилектешмин”,-деди А.Кадырбаев.

“Белгилей кетсек, окуя 17-апрель саат 14:00 чамасында катталган. Шакиров көчөсүнүн тургуну Рыскулова Нуриза эшик алдында ойноп жатып, “Увам” каналына тобун агызып жиберген. Аны алам деп артынан каналга өзү да түшүп кеткен. Бекиев сууга боюн таштап аккан кызды болжол менен 500 чакырым аралыктан алып чыккан”, - деп билдирет басма сөз кызматы.