Жалал-Абад шаарында үй жандыктарынын жана канаттууларынын эсеби алынып жатат. Бул иш-чара жыл сайын жүргүзүлүүчү иш-чараларга кирет жана анын жогорку деңгээлде өткөрүлүшү үчүн шаар мэриясы тарабынан атайын шаардык штаб түзүлгөн. Бул тууралуу Жалал-Абад шаарынын мэриясынын экономикалык өнүгүү бөлүмүнөн билдиришти.

Аталган бөлүмдүн башчысы Салыжан Умаровдун айтымында, азыркы тапта шаар аймагында менчигинин түрүнө карабастан дыйкан (фермердик) чарбаларда, калктын жеке көмөкчү чарбаларында, мамлекеттик, жамааттык жана көмөкчү ар кайсы чарбаларда кармалган малга жана үй канаттууларына, ошондой эле башка да жандыктарга (ит, мышык) санак жүргүзүзүлүп жатат.

- Бул иш-чара шаарыбыз үчүн маанилүү, себеби биздеги малдын, канаттуулардын жана башка жандыктардын так эсебин алышыбыз керек. Ошондуктан бул иш-чараны мыкты деңгээлде өткөрүү максатында шаарда атайын штаб түзүлүп, аны шаар мэринин биринчи орун басары жететктейт. Айтып кете турган нерсе, бул иш-чарага шаардык коомчулуктун өкүлдөрү, айрым окуу жайлары да тартылган. Ал эми шаардык тийиштүү кызматтар иш-чаранын жакшы өтүшүнө көмөк көрсөтүшүүдө, - дейт ал.

Эскерте кетсек, шаардык тийиштүү кызматтар эл арасында бул иш-чаранын мааниси жана зарылдыгы тууралуу эл арасында түшүндүрүү иштерин жүргүзүшүүдө. Ал эми санак иши жыл аягына чейин аяктоого тийиш.