Бүгүн, 5-декабрь күнү Жалал-Абад аймактык шайлоо комиссиясы өзүнүн отурумун өткөрүп, анда БШКнын “Өнүгүү-Прогресс”, “Ата-Журт”, “Ата-Мекен” партияларынын “КСДПнын талапкерлерин тизмесин түзүүдө гендердик норманы сактабаганы жана жайгашуу тартибин бузгандыгын”  көрсөткөн арызы боюнча кабыл алган чечими каралды. Бул тууралуу Борбордук шайлоо комиссиясынын аймактагы өкүлү Дамир Жүндүбаев билдирди.

Анын берген маалыматына караганда, БШК тарабынан аталган үч партиянын арызы каралып, анда мыйзам бузуучулукту чететтүү боюнча АШКга сунуш берилген. КСДПнын тизмесиндеги мыйзам бузуучулукту убагында билдирбегендиги үчүн Жалал-Абад АШКнын төрайымы Бактыкан Нуралиевага сөгүш берилип, ал кызматынан четтетилди.

“Жогорудагы үч партиянын арызынын негизинде Жалал-Абад аймактык шайлоо комиссиясы 30-ноябрда чечим кабыл алгандыгына карабай, 2-декабрда кайрадан башка чечим чыгарганы туура эмес болгон. Ошол себептен, бүгүн аймактык шайлоо комиссиясы БШКнын сунушун карап, төрайымды алмаштырды. Ал эми  2-декабрда кабыл алган “КСДП партиясын шайлоодон четтетүү” боюнча чечимин бүгүн кайрадан карап, аны өзүнүн чечими менен жокко чыгарды. КСДПнын тизмесинен 24 талапкер чакыртылып алынып, тизмеси мыйзамга ылайыктуу кайрадан түзүлдү”, - дейт Д. Жүндүбаев.

Жалал-Абад аймактык шайлоо комиссиясы 2-декабрь күнү КСДП партиясынын талапкерлеринин тизмесин жокко чыгарган чечим кабыл алган. Андан кийин, АШКнын айрым мүчөлөрүнө ар кандай кысымдар болуп жаткандыгын айтышкан. Ал эми 3-декабрь күнү АШК өздөрүнүн жыйынын өткөрүп, Алтынай Маматованы төрайым кылып шайлашкан. Бирок, жыйындын протоколун жазууга ОИИБнын 10-бөлүмүнүн 3 кызматкери иш бөлмөсүнө кирип алышкандыктан, тоскоол болуп жаткандыгын комиссиянын мүчөсү Насыйкат Калымбетова билдирген болчу.

Жалал-Абад АШКнын бул кабыл алган чечимине “Өнүгүү-Прогесс”, “Ата-Журт” жана “Ата-Мекен” партиялары нааразы болуп, өздөрүнүн арызын даярдап жатышкандыгын билдиришти.

- Аймактык шайлоо комиссиясы 2-декабрда кабыл алган чечимин өзү кайра 5-декабрда жокко чыгарып жаткандыгынын себеби, бул күч органдары менен шайлоо комиссиясынын мүчөлөрү иштеген жердеги жетекчилеринин түздөн-түз кийлигишүүсүнөн жана аларды кысымга алуусунан улам болуп жатат. Тизмени шайлоого бир жума калганда кайрадан түзүп чыгууга уруксат берген мыйзам Кыргызстанда жок. КСДПнын тизмесиндеги талапкерлердин бир нечесинин дареги МККнын сайтынан текшергенде Бишкек шаарынын, Базар-Коргон, Сузак райондорунун тургундары болуп жатат. Биз партиялык тизмеге кирген талапкерлердин тизмесин биздин көзүбүзчө текшерип бергиле десек, АШК ушул күнгө чейин текшербей, биздин арызды карабай жатышат. Ошол себептен, биз арызыбызды БШКга жазып даярдап жатабыз. Жалал-Абад АШКсы 2-декабрда өзү чыгырган чечимин өзү жокко чыгара албайт. Себеби, мындай мыйзам эч жерде каралбаган. Ошондой эле, ал чечимге нааразы болуп эч ким арыз жазган эмес, - дейт “Өнүгүү-Прогресс” СПнын өкүлү Майрамбек Адылбеков.