3-декабрь - Ден соолугунан мүмкүнчүлүгү чектелген жарандардын эл аралык күнү катары Бириккен улуттар уюмунун башкы ассембилеясы тарабынан белгиленген. Бул эл аралык күн жылда Жалал-Абад шаарында белгиленип келет. Быйыл да Токтосун Тыныбеков атындагы филармонияда белгиленди. Бул тууралуу шаардын вице-мэри Айзат Раматиллаева билдирди.

Анын айтымына караганда, бул күнгө атайын бир айлык өнөктүк жарыяланган. “Ошонун негизинде шаардагы бардык мекеме-ишканалар мүмкүнчүлүгү чектелген жарандарга материалдык колдоолорун көрсөтүштү. Ошондой эле, жергиликтүү бюджеттен 350 миң сом акча каражаты бөлүндү. Бул жарандардын көңүлүн көтөрүү максатында мектеп окуучулары жана маданият кызматкерлери тарабынан концерттик программа даярдалып, көрүүчүлөргө тартуу кылынды”, - дейт ал.

Алынган маалыматка караганда, шаардагы психоневралогиялык статционардык жатак үйүндө да бул күн белгиленип, бир канча жетекчилердин катышуусунда мектеп окуучулары, студенттер тарабынан аталган жатак үйдүн тарбиялануучуларына оюн-зооктор уюштурулган жана балдарга алар тарабынан белектер берилген.​