АКШнын Юстиция министрлиги тарабынан Европада тоңдурулган 850 миллион долларлык активдер өзбек бийлиги өлкөдөгү адам укуктарынын сакталышы боюнча бир нече шарттарды аткаргандан кийин гана Өзбекстанга кайтырылып берилиши керек. Бул тууралуу учурда АКШда жашап жаткан «Күнөс Өзбекстан» коалициясынын негиздөөчүсү Санжар Умаровдун The Washington Post гезитине жарыяланган макаласында айтылат.

Иш жүзүндө Гүлнара Каримовага тиешелүү болгон ал акчалар ири телекоммуникациялык компаниялардын маркум президент Ислам Каримовдун улуу кызына пара берүүсүнө байланышкан коррупциялык ишти тергөөнүн алкагында тоңдурулган.

Санжар Умаровдун пикиринде, АКШнын жаңы шайланган президенти Дональд Трамптын администрациясы ал акчаларды жемкорлуктун курмандыктарына кайтарып бериши керек. Ал Казакстандагы «Бота» фонду сыяктуу кайрымдуулук фонд ачып, каражатты ошонун эсебине которууга мүмкүн деп эсептейт. Макаланын автору жазгандай, акчаларды расмий Ташкентке кайтарып берүү, аларга мурда мыйзамсыз ээлик кылган адамдарга кайтарып берүү дегенди түшүндүрөт.

29-ноябрда өзбек саясий мигранттарынын тобу Change.Org сайтында петиция даярдап, анда АКШ жана Европанын айрым өлкөлөрүнүн бийликтерин 850 миллион долларды Өзбекстан өкмөтүнө кайтарып бербөөгө чакырган. Петициянын авторлору көрсөтүлгөн сумма мамлекеттик жемкорлуктун чыныгы курмандыгы эсептелген Өзбекстан элинин чыгымдарынын ордун толтурууга багытталышы керек деп эсептешет.