Сузак районундагы Дом-Ата аталышындагы өзбек тилдүү мектепте "Манас күнү" белгиленип, анда Жалал-Абад облусунун аймагынан топтолгон жаш манасчылар арасында облустук “Манас айтуу” сынагы өтүп жатат. Бул тууралуу ОИИБнын басма сөз кызматы билдирди.

Алынган маалыматка караганда, бул сынакты жаш өспүрүмдөрдү патриоттуулукка тарбиялоо, мекенди сүйүүгө үндөө жана улуттук баалуулуктарды жаштарга кеңири таанытуу максатында Жалал-Абад облустук ички иштер башкармалыгы "Мекеним менин-Кыргызстан" долбоорунун алкагында уюштуруп, ага түрдүү улуттардан топтолгон 7 жаштан 15 жашка чейинки  14 манасчы катышууда.

Аталган иш-чаранын ачылышы шаңдуу башталып, окуучулар мамлекеттик гимнди жандуу үн менен ырдашты. Ошондой эле өспүрүмдөр өздөрүнүн улуттук көрүнүштөгү чыгыштары менен жалпы коноктордун патриоттук сезимдерин ойготуп, тынымсыз кол чаап турууларына шарт түзүштү.

Эске салсак, 4-декабрь "Манас күнүнө" карата Манас айтуу иш-чарасы "Тарых жана маданият" жылынын алкагында облустук деңгээлде өткөрүүгө облустук милиция жана жергиликтүү бийлик демилге көтөрсө, ага  билим берүү бөлүмү, усулдук борборлор жана укук коргоо органдары көмөкчү болушкан.